Kaloríureglur fyrir jólin

Ég fæ reglulega áminningu um það hversu bjórinn inniheldur margar kaloríur.  Nú verður spennandi að sjá hvort Volcano bjórinn frá Vestmannaeyjum verði jafn kaloríuríkur eins og bjór almennt - en hann verður án efa góður!

Fékk sendar þessar áhugaverðu leiðbeiningar um kaloríur sem eru gagnlegar nú fyrir jólin, og gott að hengja á ísskápinn:

                    KALORÍUREGLUR FYRIR JÓLIN                              

1. Maturinn sem þú borðar þegar enginn sér til hefur engar kaloríur.
2. Þegar þú borðar með öðrum eru einungis kaloríur í matnum sem þú borðar umfram þau.
3. Matur sem er neytt af læknisfræðilegum ástæðum (t.d. jólaglögg, heitt súkkulagði, rauðvín o.fl) inniheldur aldrei kaloríur.
4. Því meira sem þú fitar þá sem þú umgengst daglega því grennri sýnist þú
5. Matur (t.d. poppkorn, kartöfluflögur,hnetur, gos, súkkulaði og brjóstsykur) sem er borðaður í kvikmyndahúsi eða þegar horft er á myndband er kaloríulaus vegna þess að hann er hluti af skemmtuninni.
6. Kökusneiðar og smákökur innihalda ekki kaloríur þar sem þær molna úr þegar bitið er í þær.
7. Allt sem er sleikt af sleikjum, sleifum, og innan úr skálum eða sem ratar upp í þig á meðan þú eldar matinn inniheldur ekki kaloríur vegna þess að þetta er liður í matseldinni.
8. Matur sem hefur samskonar lit hefur sama kaloríufjölda (t.d. tómatar = jarðaberjasulta,  næpur = hvítt súkkulaði)
9. Matur sem hefur verið frystur og matur sem er frosinn (t.d. súkkulaðiís) inniheldur ekki kaloríur því kaloríur eru hitaeiningar. 

 

Skrifað undir samning vegna fyrirhugaðar bjórframleiðslu í Eyjum

Frábær en annasöm helgi - nú taka ný og spennandi verkefni við

Það var fjörug helgi í MBA náminu föstudag og laugardag.  Við erum að puða við fræðin: greiningu viðfangsefna, tölfræði, markaðsfræði - og svo eins og fjögur verkefni þar fyrir utan.  Við sitjum sveitt við í fyrirlestrum tvo daga í röð, frá kl. 9 - 17.  Svo er oftar en ekki unnið í hópum í hléum.  Ekki var þetta nóg, því í morgun (já, á sunnudagsmorgni!) var auka-dæmatími í tölfræði, frá 10 - 13.  Mikið að gera - en mjög áhugavert.

Sunnudagurinn eftir hádegi var ekki slæmur, Ásgeir Bjarni afasrákur kom í heimsók og var hjá okkur þar til restin af fjölskyldunni hans ásamt langömmu komu í mat til okkar.  Notalegt í alla staði, við nafnarnir fórum í sund, skruppum í búðina og höfðum það bara ósköp notalegt saman. 

Nú hef ég ráðið mig í nýtt starf, og hefst handa á morgun.  Það er spennandi vettvangur - innan ferðaþjónustunnar.  Fullt af áhugaverðum og krefjandi verkefnum framundan - svo væntanlega þarf ekki að kvíða verkefnaskorti næstu vikur og mánuði.  "Eigum við að ræða það eitthvað - eða ?" - svo vitnað sé í fleyg orð frægrar persónu í skemmtilegum framhaldsþætti á Stöð 2.

Hugum að því sem skiptir máli

Það var einstaklega hrifnæmt að hlusta á þakkarávarp Hr. Sigurbjörns Einarssonar biskups, er hann tók við verðlaunum Jónasar Hallgrímssonar á degi íslenskrar tungu.  Meitlað málfar og lipurt tungutak hefur ávallt einkennt orðræðu þessa mikla kennimanns, svo að unun er á að hlýða.  Maður leggur við hlustir þegar hann tekur til máls, hvort heldur er á prenti eða í mæltu máli.  Mikil er gæfa þessarar þjóðar að njóta samvista við þennan andlega föður okkar, sem enn í hárri elli deilir með okkur visku sinni og speki.

Umræðan undanfarnar vikur um stöðu tungumálsins og hinna meintu þarfa atvinnulífsins, þar sem menn gera því skóna að nauðsynlegt sé að taka upp ensku ýmist samhliða eða í stað íslensku leiðir hugann að varðveislu og þróun tungumálsins.  Það velkist enginn í vafa um að nauðsynlegt er að viðhafa stöðuga árvekni, svo tungan glatist okkur ekki.  Tungumálið er jú hluti af sjálfsímynd þjóðarinnar, sem hér hefur þraukað í liðlega ellefu hundruð ár.  Það er því brýnt sem aldrei fyrr að standa vörð um tunguna. 

Skólarnir og menntun ungviðisinis er lykillinn að árangri á þessu sviði.  Það er bráðnauðsynlegt að efla móðurmálskennsluna, ekki síst málvitund, tjáningu og framsögn.  Í þessu sambandi er vert að huga að þeirri staðreynd, að enn er kennd danska í grunnskólum þessa lands.  Það eru reyndar einungis örfá ár síðan danska var fyrsta erlenda málið sem skólabörn kynntust.  Danska mun hvergi kennd fyrir utan danska konungsríkið nema hér á Íslandi.  Ísland hætti að tilheyra Danmörku árið 1944.  Af hverju kennum við þá ennþá dönsku hér?  Er ekki nauðsynlegt að staldra við og nýta þá krafta sem fara í dönskukennslu og efla þess í stað móðurmálskennsluna?  Það er undantekning að hitta Íslendinga sem bjarga sér vel á dönsku.  Þeir eru auðvitað einhverjir, en flestir þeirra eiga annað hvort einstaklega gott með að læra tungumál eða hafa búið og/eða lært í Danmörku.  Flestir Danir kunna ensku.  Það er lítið mál að bjarga sér í Danmörku á ensku.  Flest allt ungt fólk á Íslandi kann ágætis ensku, sem það bæði lærir í skólanum og með öðrum hætti, t.d. á með tölvunotkun.  Fyrir þá sem vilja læra dönsku mætti hins vegar bjóða upp á það sem valkost, rétt eins og þýsku, frönsku, spænsku o.s.frv.

Góður vinur minn, Sigtryggur Jónsson, býr í New York, og hefur búið þar hátt í þrjá áratugi.  Í samtölum okkar í gegn um tíðina höfum við margsinnis rætt dönskukennsluna á Íslandi.  Það er býsna gagnlegt að hitta Íslendinga sem hafa búið lengi erlendis, og ræða við þá þjóðmálin.  Þeir hafa meiri fjarlægð á hlutina, og sjá þá oft í öðru ljósi en við hin sem hér lifum og hrærumst í daglega amstrinu.  Allt fram undir þetta hef ég varið dönskukennsluna, en nú held ég að ég gefi mig, og fallist á þau rök að það væri viturlegra að eyða dýrmætum tíma og kröftum kennara okkar í eitthvað gagnlegra og raunhæfara en dönskukennslu.  Það væri öllum greiði gerður með þvi. 

Sigurbjörn Einarsson hlaut verðlaun Jónasar Hallgrímssonar

Fengum skutl til London

Jæja góðir hálsar, við erum sem sagt komin heim eftir vel heppnaða dvöl hjá Davíð og Ýr í Newcastle.  Flugum með easyJet frá Newcastle til London, og þaðan áfram með Iceland Express.  Drengurinn var ekkert að tvínóna við hlutina, fékk vaktaskránni breytt og var því við stjórnvölinn með foreldrana innanborðs.  Frábært flug í alla staði, og lendingin eins og best gerist!  Hér má sjá mömmu með stráknum sínum í lok ferðar.

Eiríkur sonur okkar kom í heimsókn með börnin eftir við komum heim, það var ekki amalegt að hitta þau öll og fá hlýjar og notalegar móttökur.  Það felst mikil hamingja og gleði í góðum og traustum fjölskylduböndum.

Nú er skólahelgi framundan, svo það verður nóg að gera.  Þar verður fjallað um greiningu viðfangsefna og ákvarðanatöku, og markaðsfræði.  Þetta lofar allt saman mjög góðu.  Mörg verkefni í takinu - svo það verður nóg að gera.

Leiðakerfisbreytingarnar að skila sér

Það eru ánægjulegar fréttir sem berast úr herbúðum Strætó bs í dag.  Fram kemur að farþegafjölgun er umtalsverð, og því líklegt að langvarandi þróun farþegafækkunar sé loks að snúast við.  Þrátt fyrir þetta má ekki gleyma því að tölurnar eru enn lágar, og "markaðshlutdeild" almenningssamgangna með því lægsta sem þekkist hjá sambærilegum borgum í nágrannalöndum okkar. 

Leiðakerfi Strætó bs var gjörbylt um mitt ár 2005.  Sú breyting virðist nú vera að skila sér.  Að sjálfsögðu skal ekki lítið gert úr öðrum þáttum sem örva notkunina, eins og að gefa námsmönnum frítt í strætó.  Það er hins vegar alveg ljóst, að þjónustan sem slík verður að vera ásættanleg, því ef leiðarkerfið er kolómögulegt gefast þeir líka upp á að nota strætó sem fá frítt.  Því miður hefur umræðan um strætó og almenningssamgöngur um langa hríð verið neikvæð, og stöðugt er vegið að þjónustunni.  Það er því einkar ánægjulegt að sjá þessa þróun.

Fyrir Strætó bs og eigendur byggðasamlagsins, sveitarfélögin á höfuðborgarsvæðinu, er þýðingarmikið að halda áfram að efla almenningssamgöngur.  Í því sambandi skiptir öllu máli að viðhafa aðgerðir sem flýta för vagnanna, þannig að þeir sem með þeim ferðast verði fljótari í förum en þeir sem kjósa einkabílinn.  Þetta á einkum við um álagstímana.  Með því að fjölga forgangsakreinum, koma upp ljósastýrðum forgangi og auka ferðaframboðið þegar flestir eru á ferðinni munu almenningssamgöngurnar eflast, og fleiri og fleiri sjá sér hag í að nýta sér þennan valkost.  Þá skiptir ekki öllu máli hvort er frítt eða ekki, það sem skiptir allan þorra almennings máli er að fá skilvirkt og öflugt almenningssamgangnakerfi á höfuðborgarsvæðinu. 

Farþegum í strætó fjölgar um 13,65%

Það var laglegt Duna!

Guðný Halldórsdóttir leikstjóri reið ekki feitum hesti frá Eddu verðlaunahátíðinni, þrátt fyrir að mynd hennar hafi fengið flestar tilnefningarnar.  Það er umhugsunarvert, því ég tel að mynd hennar sé meðal hennar bestu mynda.  Guðný er vaxandi leikstjóri og tekst stöðugt á hendur ný og ögrandi verkefni.  Það má reyndar einnig velta fyrir sér þeirri furðulegu staðreynd, að Astrópía fékk nánast engar tilnefningar, þrátt fyrir að vera best sótta íslenska myndin í ár.  Vantar e.t.v. raunveruleikatengingu hjá Eddunni?

Guðný er vel að bjartsýnisverðlaununum komin.  Við áttum samleið um hríð á 10. áratugnum, hún var þá bæjarfulltrúi í Mosfellsbæ og ég embættismaður hjá sveitarfélaginu.  Einstaklega gott að vinna með henni, og það er að ég hygg á engan hallað þótt ég segi að hún er sannarlega vel að þessum verðlaunum komin. 

Til hamingju með verðlaunin Duna!

Guðný Halldórsdóttir fékk bjartsýnisverðlaunin

Búðarferð án forsjárhyggju

Við Davíð fórum í dag og keyptum í matinn, nánar tiltekið í þá ágætis verslun Sainsbury´s.  Það er gaman að fara í góðar matvörubúðir þar sem er gott úrval og góð verð.  Við keyptum kartöflur og ýmislegt fleira, því nú erum við að sjóða hangiket.  Það verður veisla með öllu tilheyrandi:  hangikjöt með uppstúf, ora grænum og öðru sem þess háttar kræsingum tilheyrir.  Nú er kominn þessi fíni ilmur í íbúðina, það er jólalykt í húsinu.

Það vakti athygli mína að auk hefbðundinna matvæla var gott úrval af áfengi ýmiss konar.  Þarna gat maður valið úr góðu rauðvíni og hvítvíni frá hinum og þessum stöðum, gott úrval af bjór, og það sem meira er að þá var hægt að velja á milli ýmissra góðra viský tegunda og annarra sterkra drykkja.  Ég tók líka eftir því að svo virtist sem að þeir sem voru að kaupa inn í búðinni voru ekkert endilega bundnir meira yfir þessum vörum frekar en grænmetinu og ávöxtunum.  Það sem meira er, bæði börn og unglingar voru áberandi meðal viðskiptavinanna, ekki varð þó séð að þau væru að sniglast í kringum vínrekkana. 

Mér finnst við Íslendingar vera heimóttalegir í umræðunni um hvort leyfa eiga sölu bjórs og borðvína í matvöruverslunum.  Umræðan ber öll keim af forsjárhyggju og því að nauðsynlegt sé að hafa vit fyrir fólki.  Mér er sagt að alkahólismi sé sjúkdómur.  Það er því líklegt að þeir sem eru haldnir þessum sjúkdómi láti ekki aðgengið að vímugjafanum aftra sér.  Mér finnst miður að hugsanleg áhrif á þá sem eru veikir fyrir eigi að hafa áhrif á það hvort allir hinir eigi að geta keypt sér rauðvín um leið og steikin er keypt.  Það er svona svipað og að taka burt allar sykraðar vörur úr venjulegum búðum af tillitssemi við sykursjúka.  Látum nú af sveitamennskunni og smásálarhugsunargangnum, lyftum huganum upp á ögn æðra plan og leyfum frjálsum straumum að leika um vanga okkar.

Næsti áfangi hafinn í MBA

Í dag hófst önnur lota í MBA náminu.  Fyrri lotunni lauk með prófum um síðustu helgi, þannig að nú er 1/8 hluti námsins að baki.  Nú eigum við að vita allt um rekstrarhagfræði og starfsumhverfi, sem og stjórnun skipulagsheilda.  Það er að vísu ekki komin niðurstaða úr prófunum, en vonandi verður það í lagi.

Nýju námskeiðun tvö sem nú fara af stað heita annars vegar "Greining viðfangsefna og ákvarðanir" og hins vegar Markaðsfræði.  Í dag erum við að sökkva okkur niður í alls kyns tól og tæki sem auðvelda greiningu viðfangsefna, jafnframt erum við að feta okkur inn í heim tölfræðinnar.  Þar er galdratólið Excel mikilvægt hjálpartæki.  Hugtök eins og meðaltal, meðalgildi, tíðasta gildi, staðalfrávik o.s.frv. er mikilvægt að kunna deili á, sem og að geta handfjatlað þau í töflureikninum.

Með nýjum námskeiðum verða til nýjir vinnuhópar.   Við í mínum hóp erum þegar búin að hittast lauslega, því ekki veitir af að hefjast handa nú þegar.  Mörg verkefni eru í deiglunni, svo það verður nóg að snúast næstu 10 vikurnar.  Ég kveð gamla hópinn með söknuði, hann var einstaklega samhentur og skemmtilegur.  Annað kvöld ætlar mannskapurinn allur að hittast og skemmta sér, svona til að hrista okkur aðeins meira saman.

Focus on your strength

Heimsótti vin minn Thomas Möller fyrr í kvöld.  Ég hef minnst á hann áður hér á blogginu.  Thomas er frábær einstaklingur og góður vinur.  Hann er í MBA námi við HR, sem sagt ekki í sama skóla og ég en samt í sams konar námi.  Það er gaman að spjalla og bera saman bækurnar, í orðsins fyllstu merkingu.

Við ræddum um stjórnun og ýmislegst sem snýr að þeim fræðum.  Maður kemur ekki að tómum kofanum þar á bæ.  Thomas er hafsjór af fróðleik á þessu sviði, hann er vel lesinn og hefur viðað að sér heilmiklum fróðleik sem hann miðlar frá sér á þann hátt að þetta verður einhvern veginn allt svo eðlilegt og einfalt. 

"Focus on your strength" - leggðu áherslu á styrkleika þína.   Þetta sannast best á því að Tiger Woods, fremsti kylfingur heims, er bestur í upphagshöggum og púttum.  Brautarhöggin eru ekki að gera sig að sama skapi.  Hvað skyldi þjálfari Tiger leggja áherslu á?  Brautarhöggin?  Nei, ekki aldeilis.  Hann þjálfar upphafshöggin og púttin.  Þar liggur styrkleikinn, og það er það sem þarf að leggja rækt við.  Í daglega lífinu þurfum við bogey spilararnir að gera það sama, hvort heldur við erum að kljást við sveifluna á golfvellinum eða bara verkefnin sem við tökumst á hendur.  Það er mikilvægt að gera sér grein fyrir hvar styrkleikarnir liggja, leggja rækt við þá eiginleika og hæfileika, í stað þess að einblína á veikleikana. 

Hin magnaða útrás

Það lætur nærri að það séu u.þ.b. 180.000 manns á vinnumarkaði á Íslandi, það er e.t.v. réttara að segja að hér séu u.þ.b. 180.000 heilsársstörf.  Það er hins vegar öllu merkilegra að íslensku útrásarfyrirtækin íslensku hafa nokkurn vegin jafn marga í vinnu hjá fyrirtkækjum sem eru í þeirra eigu á erlendri grund.  Ég hygg að margir hafi ekki velt þessu fyrir sér. 

Í morgun var áhugavert viðtal við framkvæmdastjóra fyrirtækisins CCP á Morgunvaktinni á Rás 1 (RÚV).  Þetta fyrirtæki framleiðir og starfrækir tölvuleikinn Eve Online.  Það kom fram í viðtalinu að u.þ.b. 200.000 manns eru áskrifendur að leiknum, og aðrir 50.000 eru í reynsluáskrift.  Hjá fyrirtækinu sjálfu vinna u.þ.b. 250 manns, á skrifstofum í þremur heimsálfum.  Þeir sem spila leikinn eru vel að merkja ekki táningar, flestir þeirra eru á þrítugsaldri.  Tölvuleikir hafa þannig haslað sér völl sem afþreying til jafns við hverja aðra afþreyingu.

Um helgina stendur CCP fyrir notendamóti þeirra sem spila leikinn,  í Laugardalshöllinni.  Framkvæmdastjórinn greindi frá því að allt að 1.500 gestir væru væntanlegir til landsins af þessu tilefni, þar af u.þ.b. 40 blaðamenn.  Sennilega er þetta næst stærsti viðburðurinn á eftir Icelandic Airvaives.  Útrásarfyrirtækið CCP hefur með þessu móti ekki aðeins umfangsmikla starfsemi víða um veröld og marga viðskiptavini, heldur færir íslenskri ferðaþjónustu dýrmæta viðbót á þeim tíma ársins sem ferðamenn almennt sækja landið ekki heim.