Hægan Electra

Enn á ný stendur til að virkja með látum, að þessu sinni í náttúruperlunni og útivistarsvæðinu í Henglinum.  Nokkrir kollegar mínir úr Félagi leiðsögumanna hafa opnað vefsíðu, þar sem þeir vekja athygli á þessum áformum.  Það er full ástæða til að hvetja fólk til að kynna sér málið, mikilvægt er að standa vel og vandlega að ákvörðunum sem þessum svo ekki verði um óafturkræf spjöll á þessu einstaka svæði.  Slóðin á vef þeirra er hér. 

Um er að ræða s.k. Bitruvirkjun, sem á að rísa rétt vestan við Ölkelduháls.  Það sem er sérstaklega aðfinnsluvert er að Orkuveitan lét sjálf kosta mat á umhverfisáhrifum, en fyrirtækið á augljóslega hagsmuna að gæta í þessu máli og því afar ótrúverðugt að slíkur háttur skuli hafður á.

Við leiðsögumenn sem höfum farið með erlenda ferðamenn um Hengilssvæðið vitum e.t.v. betur en margir aðrir hvers kyns náttúruperla svæðið er.  Það er einstakt að komast í slíkt umhverfi einungis steinsnar frá höfuðborginni.  Svæðið hentar frábærlega til útiveru, gönguferða, baða í heitum lindum o.m.fl.  Það hlýtur að skipta máli að horfa einnig á þessa hlið málsins, ekki síst í ljósi þess að ferðamönnum fjölgar stöðugt og þeir sem hingað sækja eru ekki síst að leita eftir ósnortinni náttúru, einkum svæðum sem hafa sérstöðu á borð við Hengilssvæðið.  Stigum varlega til jarðar í þessu máli, eins og leikritaskáldið sagði:  Hægan, Electra....

 

Telja að virkjun muni spilla ómetanlegri náttúruperlu

Athugasemdir

[Lára Hanna Einarsdóttir, 30.10.2007 kl. 15:37]

Sæll Ásgeir og þakka þér fyrir að taka undir í umræðunni um þetta brýna hagsmunamál sem snertir alla Íslendinga,
því hver veit hvar borið verður niður næst með virkjunar- og stóriðjudraumana.

Ég er einn aðstandenda mótmælanna og hvet alla Íslendinga til að kynna sér málið á vefsíðunni www.hengill.nu 
og senda Skipulagsstofnun og Sveitarfélaginu Ölfusi athugasemdir. Því fleiri sem það gera í hvert sinn sem á að leggja náttúruperlur í rúst vegna gróðarsjónarmiða, því betra og vænlegra til árangurs. 

Hér eru stórkostlegar myndir sem sýna betur en nokkur orð geta gert
hve undursamleg náttúrufegurð er í húfi:

http://photo.blog.is/blog/photo/entry/351625/

Látum ekki stela frá okkur landinu og ómetanlegum auðævum þess og leggja í rúst!

Kveðja,
Lára Hanna

http://www.hengill.nu/ - www.icelandguide.is

[anna maría geirsd (IP-tala skráð) 30.10.2007 kl. 20:19]

Hvað er í gangi á þessu landi? Virkja virkja virkja. Við endum sem einhverskonar þjóð á landi sem er einskisvirði nema fyrir virkjun orku. Og krafturinn sem úr því fæst  er ekki einu sinni ætlaður okkur nema að hluta til. Hráefnisframleiðendur fyrir hina jarðarbúana.

[Lára Hanna Einarsdóttir, 30.10.2007 kl. 20:55]

Ómar er með vangaveltur um málið hér:

http://omarragnarsson.blog.is/blog/omarragnarsson/entry/351828/